جعفر عباس يكتب: عيد الحب (نص في غاية الامتاع)..

الأستاذ اللذيذ والعزيز الطيب عبد الماجد/ علوب:
يازوووول ناس ( فلقصة ) قايمات وقاعدات قالو عاملين احتفالية بمناسبة عيد الحب، كاتبه في صفحتا …: الحب لا يعني الحبيب بمعناه الحرفي …الحب أسمى من ذلك بكثير …لذلك لا تربطوا عيد الحب بالحبيب ….
حبو الحياة ….!! حبو الطبيعة …!! حبو الشجر
حبو بعض عليك الله شوف ( فلقصة ) المستهبلة دي ..آخر شكله مع ( أمونة قالت ليها تستاهلي الحرق وخسارة فيك الجاز ، ناس حبو بعض
المهم الفكرة وجدت صدي في الأوساط الفنية، ناس ( مروه ) يعجبوك طوالي دعمو الإطاري …!!في النهاية إتفقو يعملو حاجة صغيرة كدا في بيت ناس أحلام الطارحة نفسها سيدة أعمال هي عندها خمصطاشر ألف، جربت أي حاجه ما نفعت …!! صواني …!! عدة ….!! تياب تنمية بشرية …!!
هسا اليومين ديل مقدمة نفسها “ميكاب ارتست” بتشحن ( رموش ) من القاهرة قالو مصنوعة من صوف الماعز البري( أمنيات ) قالت استعملت رموش ( أحلام ) دي بقت ما بترمش …!!( أمونة ) قالت ليها شفت ليك ( غنماية ) رمشت ….!!

المهم ( أحلام ) تبرعت بالمقر والاحتفال في بيتم قالت تستغل ( الإيفنت ) event دا للترويج لي حاجاتا هي حافظا ليها تلاته كلمات بالانكليزي ياها ( ايفنت ) دي و successful ( ودي غالباً بتقولا غلط والتالتة ( Woooow) قايلاها كلمه، طبعاً ناس ( صفا ) بتعجبم القصص والحاجات الزي دي ….برضو دعمو التوجه …كان الخلاف في إنو الحفلة يعزمو فيها أولاد الحله ولا بنات بس .. قالو بالتصويت …..فلقصة أول زول صوتت لحضور الأولاد المهم النتيجة كانت 3/7 سبعة صوتو للحفلة المشتركة عدا ( إبتهاج ) و ( مزدلفة ) ديل قالو بنات بس ….!!

مودة عصعوص إمتنعت عن التصويت دايرا تلعب على الحبلين …..حصلت أي مشكله في حبل تنط في ( التاني ) و( تغريد ) صاحبتم قالت ماشه حفلة فنان ( سوري ) إسمو منو كدا ما عارف ….قالو جا الخرطوم، المهم عزمو أولاد الحلة كلهم قالو دعوه للتلاقي ومناقشة قضايا الحلة .شايف ليك ( مشاعر ) في لجنة الضيافة خلاص البت شايله ليك الدفتر وتكتب داخلة ومارقة ويعوجو في الخشم بتكتب في شنو ما عارفا .هي كلها قزازة بيبسي وسندويتش طعمية وفول ….المرة دي إطورو شوية قالو يجيبو ( مكنة شاورما ) …..نحن ندفع كاش وأي واحده من البنات تعمل ( طبق اليوم )
بس حلفناكم بالله أعفونا من طبق ( تقوى ) دي آخر احتفال جابت ليها حاجه كدا لو ما كل ما دقيقة شابكانا ليك أكلو من ( البسبوسة ) دي رهيبة شديد ما كان عرفناها ذاتا دي ( بسبوسة ) …عجين كدا بالسكر نجضتو وجات ….
منتصر قال لي دي لقيمات معدلة وراثياً …
فلقصة تلف وتدور تعمل في الفحص الأمني للمدعوين طبعا دا كلو دايره تتأكد ( مدثر ) جاي ولا لا، طبعاً ( مدثر ) دا ( كراش ) الحلة كلها قالو بشبه
تامر حسني البنات ديل غايتو ( نفضونا ) كلو كلو ) …..!!
( مدثر ) ود مسكين كدا وفي حالو لكن ( فلقصة ) غايتو ( ألم شديد ) داخلة في شخصية ( أنغام ) ( أها دا ياهو دا الشجر القالو حبو …!!
(المهم يازول الحفله عنوانها ( أعباء الحي ) وفحواها أعياد الحب
وصلنا مقر الاحتفال و( أحلام ) في مقدمة المستقبلين يازول الشعر مجلط
مشاعر قالت لي ما يفوتك الشعر دا دعاية لكريمات شعر بتعملا قلت ليها الحمد لله الشفتيهو بي عينك قبل ما تجيني تقولي لي دايرين نشتري …ياها دي قدامك سخلة ودقتا المطره وهي ولا شغالة بي زول داخلة في شخصية
( كليوباترا زي مية حلق كدا وهلال وسلاسل
وبنات الحلة بدأن في الوصول ناس ( ريان ) مطقمين كم حاجه كدا حمرا في اشارة مبطنة للمناسبة و( صفا ) منفوشة كأنو عيد ميلادا ….وكل دقيقة يعاينو في التلفون خلاص يعني البت بتتلقى في التهاني ..!!( مشاعر ) قالت لي نص الرسايل من أمها الظاهر خلت العدة مردومة ومرقت ( صفا ) دي طبعاً أكتر زول غسل عدة في السودان يدينا ديل اتسهكن…!!
والأغنية المع العدة أهم من العدة ذاتا اليومين ديل ماسكة في ( ياخالتو ولدك دا ) …..!!وكت تقول ليك ( عود المحلب الني بتاخد ليهاوقفة ….. ناس ( مروه ) جن برضو يتجرجرن وجات معاهن ( حباب ) وحباب ) دي عايشه معانا بي جسدا في الحلة وروحا محلقة في ( بيروت إسمها بس السوداني
حافظة ليك أخبار النجوم العرب ديل اكتر منهم وكل قصصم …!!بتردمنا عادي ،،قالت الرجل السوداني ما رومانسي !!
قالت ( كفوري ) و الزغبي ) رجعو تاني مع بعض عاملين دويتو مبالغة
صبري قال لي ديل شنو القالتم ديل ؟؟ دواجن؟ هي قاصده ( وائل كفوري ونوال الزغبي ) التقول أولاد خالتا
فلقصة ) العواليق كمان ….قالت طبعاً أولاد حلتنا ديل عايشين في كوكب آخر مستحيل يجي واحد فيهم شايل ليهو وردة ولا دبدوب ….
كلمنا ( ود الحاجه ) قال حيمشي يشوف ليهو ( دبدوب ) حي يجي ياكل البت دي يريحنا منها ….!!أها ( مدثر ) وكت جا داخل بقت تترتح دي الحالة من غير دب سلم على الناس جات هي طبعا سلمت عليهو في يدو نحن كشحتنا من بعيد …!!
هو المسكين فعلا قايلو لقاء مفاكرة في شؤون الحلة
قال ليها ليه إخترتو نص الاسبوع ….كان تخلوه في نهايتو قالت ليه لكن الحب ما بتأجل …( كلام لكن ) مع ابتسامة بيض كذا ….!!
( أمونة ) ماعزموها …رسلت صاروخ أرض جو من البيت كتبت في ( الفيس ) ( البيت وسخان ومحتفلين بي عيد الحبان ضربتنا نووي دخلنا ( الحرب الباردة ) في الحله من جديد ) ….!!
( أحلام ) رحبت بالحضور واعلنت عن منتجاتها الجديده …
( ياهو كريم ( السخلة ) الفي راسا دا ….وواحد قالت للنخرين
تفتيح مسالك دا ولا شنو ..!!
وجابت ليها واحده عديل قالت اقدم ليكم ) ( المودل ) ( جيجي ) مع منتجاتي جيجي جات مارقة معسمة فينا حاسه بالعظمة ….تشبه ( تحتمس السادس
المهم ( فلقصة ) طبعا خجلت قالت وزي ما تعودنا يا اخوانا نتلاقى من وقت لي آخر في لقاءات ودية تفاكرية زي دي نناقش قضايا الحي …!! في أجواء احتفالية وتشيل وتعيد في ( تفاكرية ) دي …!!تكون سمعتها الليله في حته
رغم اننا من الاستقلال ونحن بنتفاكر
عامر شغل ال DJ …..أنا ما شايف غير ساوند صغير كدا وهو مصر إنو دا DJ والراس مربوط والسماعات فلقصة منتشية كدا قامت قرت لينا رسالة من التلفون قالت ياجماعة ( رحاب ) بتعتذر ليكم كلكم ما حتقدر تجي ماشه مع أمها الدكتور …!!غايتو جنس إحباط كدا خلاص الفالنتاين إتيتم ) …..
أصلو ( فلقصة ) دي مستحيل تجيب ليها خبر سمح …وهي بتقرا في الرسالة باين عليها الفرحة عارفة ( المدرعة ) دي كان جات بتقش الجبهة دي كلها وتحسم الفوضى …!!

( أسامة ) دا من أولاد الحله الهادييين بعد الرسالة دي قال لي …خلاص بعد دا أي شي ما عندو طعم … (زولك طلع ممكون وصابر شكيتك على الله يارحاب نطقني الحجر، قلت ليهو طوالي حقو يشغلو لينا: عدت يا عيدي بدون زهور هي لكن رحاب ما عذاب نرجع لي ( حباب السراب ) قالت لي ( عامر ) عليك الله شغل لينا إليسا ) ….فات الاوان والله مافي زول أوانو فات غيرك شغلوها ليها عامله فيها بتغني معاها وكلو كضب ….!!
وتاني ( عامر ) دور …والقطعة الحمرا في الراس المره دي ( إيمان الشريف
اليدين دي فوق وكت تقول ليك ( في هيبة حضورو فلقصة كان ليها مراد تمشي تقبقب ( مدثر ) دا وتكب احساسا وهو المسكين قاعد يتلفت …!!
وناس ( مروه ) و( وجدان ) و ( أمنيات) اليدين دايرات يتكسرن من الصفقة،

( مروه ) دي كمان عندها مشكلة كبيرة …أول ما تنفعل طوالي بتزغرد …!!فقعت ليك زغرودة في نص الحلة حاجه أصلو ما معقوله لا عرفنا احتفال لجنة حي لا عرفناها صبحية ..!!
( مشاعر ) طبعا كالعادة داخلة في الشخصية الرزينة …!!( ما شافوها في البيت ….بتغني مع المرايات دا كلو كوم و( حباب ) دايره تطير في الجو دا مع ( وليد من الشكرية حافظاها صم …!!وكت وصلت تقول يا يمة دافنة ليا عملت take off … وهو زوووول دافنه ليها مافي …!!
مدثر ) طلب (ضنين الوعد ) لي كابلي ….الحفلة نصها مشو على ( مكنة الشاورمة )…!!
( فضحونا الفاقد التربوي ديل المهم غايتو قضينا وقت جميل ضحك جد وشمارات طلعنا شويه من الأجواء الضاربة في البلد دي …((((( ولكن من يخرج البلد منا )))))) ….!!
( أحلام ) دولة المقر قدمت كلمة شكرتنا على الحضور
وقالت نلتقي في الاجتماع القادم لتحديد يوم النضافة
وبالمناسبة في ( بواريك ) جايه يوم السبت :…حاجه كدا واااااو …!!
( شايفين واااو ) ..
الحمد لله الليله successful مافي ….!!
طلعنا من الاحتفال ما فاهمين ولا حاجه نضحك سااااي
ود الحاجه قال ( أحلام ) دي ما عندها حاجه للجلحات
يازووول ضحك جد .. جيجي طلع اسمها الجودلية .