محمد عبد الماجد يكتب: فاتاو سليمانا عمره (19) سنة مع وقف التنفيذ!!

· (أعلن نادي المريخ السوداني، عن وصول اللاعب الغاني فاتاو سليمانا. وقال النادي بحسب تعميمٍ صحفي،” استقبل المريخ السبت الظهير الأيسر الغاني فاتاو سليمان، وسيخضع اللاعب للكشف الطبي صباحاً تمهيداً للتوقيع في التسجيلات الحالية”).
· صباحا وين؟ دا احسن تسجلوه في الليل.
· السترة والفضيحة متباريات.
· قبل هذا الخبر كانت مواقع التواصل الاجتماعي قد تداولت صور للاعب وقارنت بين الصورة والعمر حيث تقول سيرة فاتاو انه من مواليد 14 اكتوبر 2003م .. يعني فاتاو (ما تعاينوا للصورة) عمره الآن (19) سنة و (3) شهور.
· الكلام دا بدون (صورة) ممكن نقبلو .. لكن بالصورة لا.
· (19) سنة في السودان بتروح (صفوف) ساكت.
· الصورة صورة لاعب على المعاش …الزول دا لو ما جائحة كورونا يفترض كان يعتزل.
· غايتو يا ناس المريخ لاعبكم فاتاو إلّا يلعب في المريخ بالباطن .. او يلبس ليه قناع.
· اوعكم تجيبوا صورتو.
· ولو جبتوا صورتو .. اوعكم تقولوا عمرو.
· فاتاو ممكن يفشل في الكشف الطبي .. اذا عصروا فى الكشف على (العمر).
· لو طلع عمرو (41) سنة ما كعب معاكم.
· سيرة الظهير الغاني بتقول عنه ان لعب ثلاث مواسم مع ميدياما وهذا يعني انه لعب لهذا الفريق الذي يلعب في الدوري الغاني وعمره (16) سنة.
· احتمال.
· ما في حاجة بعيدة.
· يمكن.
· وربما.
· وقد يكون.
· يا ربي الزول دا قبل (3) سنوات كان شكلو كيف؟
· الشيء الذي يفضح عمر هذا اللاعب ان قيمته التسويقية حسب (ترانسفير ماركت) 50 الف دولار .. ودا كلام غير منطقي ..لأن لاعب في هذا العمر وبهذه الامكانيات يفترض ان يكون سعره فوق الـ 200 الف دولار … الغامبي لامين جارجو قيمته التسويقية اكثر من (250) الف دولار ..لأن الهلال دفع فيه اكثر من هذا المبلغ .. عاوز اعرف فاتاو سليمانا وهو في هذه السن كيف يكون بـ (50) الف دولار وهو غاني ويلعب في الدوري الغاني الذي يصدر الى اوروبا مباشرة .من يمتلك هذه الامكانيات ويكون في هذه السن سعره بيرتفع.
· المريخ السنة دي ح يكون متل (مجلس الشيوخ).
· او هو فعليا (فريق الشيوخ).
· المريخ تعاقد ليه مع (4) محترفين برازيليين دفعة ريكاردو في الملعب.
· على ما يبدو ان ريكاردو بحترم الزمالة شديد .. وإلّا ما تعاقد مع (4) برازيليين (دفعة).
· تاني ناس المريخ بكونوا في حاجة الى (سماعات) اذن .. و(نضارات) طبيبة و كراسي متحركة.
· الجماعة ديل في اجواء السودان ما بصمدوا ليكم كتير.
· 4 برازيلين في المريخ ليه؟
· وعشان شنو؟
· ديل لو جبتوهم يؤهلوا ليكم الاستاد .. عندنا فيهم كلام… يؤهلوا المريخ من المجموعات لا.
· اتخيلوا المريخ وهو يلعب في عطبرة امام الامل وتشكيلة المريخ فيها (4) برازيليين.
· تتوقعوا البرازيليين ديل في عاصمة الحديد والنار ممكن يفهموا حاجة؟
· المشكلة انهم باقى عمر في الملاعب.
· نهايات.
· وخريف ملاعب.
· او حضارات سادت ثم بادت.
· دا اذا كان من الاساس في (حضارات).
· فاتاو دا لو عمره (19) سنة .. يكون مع وقف التنفيذ .. يعني من قبل عشرة سنة (العداد) بتاع العمر عندو متوقف.
· فاتاو واقف في (19) سنة.
· او يمكن (19) سنة عندهم في غانا بتعادل (40) سنة في المريخ.
· يكونوا ما حسبوا الجمع والعطلات الرسمية والسنوات (الكبيسة).
· يعني يعدو سنة.
· ويفطوا سنة.
· المريخ كان ما عندو مجلس ادارة.
· وما عندو ملعب.
· وهسع بقلب قوي نقول ليكم : المريخ عندو محترفين كمان.
· المحترفون ديل .. الذين تعاقد معهم المريخ البرازيليين الاربعة زايد الظهير الغاني لو مشوا على صندوق المعاشات بلقوا اسماءهم نزلوا هناك.
· اوعكم تصرفوا ليهم عملة صعبة يا ناس المريخ.
· الجماعة ديل طوالي يمشوا يصرفوا من صندوق المعاشات.
· ولا كلمة.
· لو اتلولوا معاكم في (الجنسية) .. جنسوهم.
· انا اول مرة اشوف لي فريق في العالم يجنس ليه (مدرب).
· دا فهم شنو؟
· دا كلام شنو؟
· غايتو قروش الدعم السريع راحت ساكت.
· معقولة بس رئيس وأعضاء مجلس المريخ ابوجيبين وهيثم كابو واسامة عبدالجليل واسامة الماحي وسلمي سيد اصغر من اللاعبين.
· اصغر من المحترفين.
· معقولة بس.
· تذكروا زمان وقت المريخ تعاقد ليه مع محترف بوسني اسمو (نجاد).
· نحن كمان بننسي.
· المحترف البوسني كان كبير في السن .. لدرجة ان مجدي شمس الدين الذي كان سكرتيرا للاتحاد العام في ذلك الوقت سافر ليه للقاهرة من اجل التوقيع هنالك ..رغم ان التوقيع في كشوفات اندية الممتاز في ذلك الوقت كان في مكاتب الاتحاد في الخرطوم.
· احتراما لسن نجاد .. مجدي شمس الدين مشى ليه القاهرة.
· نجاد في اول مباراة شارك فيها كانت مباراة اعدادية في ام درمان امام احد اندية الدرجة الثانية على ما اعتقد .. نجاد في هذه المباراة بعد اول (5) دقائق من عمر المباراة رفع ايدو وقال للجهاز الفني بتاع المريخ غيروني.
· قالوا ليه : مالك؟
· قال ليهم الاضاءة كعبة!!
· قالوا ليه اضاءة شنو يا ود الناس فضحتنا فضيحة ؟ المباراة تلعب (عصرا) والشمس في نص السماء… اضاءة شنو كمان؟
· نجاد دا مرة الحكم طلع ليه كرت اصفر .. افتكرو (رصيد).
· هسع المريخ بيعيد في نفس التجربة.
· 4 برازيليين بالمعاش .. وظهير غاني عمرو (19) سنة .. إلّا (19) سنة في الدوري الغاني.
· على ما يبدو ان ريكاردو بعد هذه السن .. الغربة صعبت عليه .. عشان كدا جاب ليه (4) محترفين من البرازيل.
· ريكاردو عاوز يتونس.
· في الوقت الذي يحدث فيه ذلك في المريخ .. انظروا ماذا يحدث في الهلال.
· العمر في الهلال شرط اساسي.
· زي الكلية الحربية.
· ما بتدخل الهلال ساكت كدا.
· في محترفين رفضهم الهلال عشان سنهم.
· وفي محترفين شالهم الكشف الطبي.
· ما في حاجة لعب.
· ما في حاجة ساكت.
· دا الهلال.
· الهلال بعاين لي قدام.
· للمستقبل.
· للاستثمار.
· نحن كنا فاكرين مشكلة المريخ في (الملعب).. هسع بقول ليكم مشكلة المريخ في (المحترفين).
· قول لعبتوا في ليبيا .. المحترفون ديل بتودوهم وين؟
· الملعب مشكلته بتتحل.. الكلام المحترفين.
· معقولة بس جايبين ليكم غاني من زمن غانا كانت اقطاعية في الكاميرون.
· هو متين غانا كانت اقطاعية في الكاميرون؟
· انا عارف ..بس الشيء البعمل فيه المريخ دا ما عمل نصاح.
· ………….
· ترس اخير : كدا قولوا لي صورة فاتاو دي اصلها كدا .. وإلّا دار السلام بتكبر الصور؟
· ………………
متاريس
· ناس المريخ لو منتظرين عيد مقدم .. احسن يشوفوا ليهم حاجة تانية.
· شوفوا ليكم برازيلي (نص عمر) بتلقوه بـ (20) الف دولار.
· عيد لا.
· لماذا يستغني الهلال من عثمان ميسي اذا كان ميسي في خانات الشباب في الهلال؟
· عاوزين نفهم.
· احسن الامور تبقى واضحة.
· جارجو وليليبو بنرجع ليهم تاني.
· لمن الحكاية تخلص.
· ليس كل ما يعرف يقال.
· لكن لينا عودة.
· المستوي البدني للهلال ممتاز.
· الهلال يمتلك جهاز فني (عالمي).
· شغل صاح.
· لو لم يخرج الهلال من هذه التسجيلات بغير (الصيني) لكفاه ذلك.
· الاتحاد العام تعامل مع لاعبي المنتخب الوطني .. زي تعامل ناس المناسبة مع (عدة) الجمعية التعاونية في الحي.
· وبرضو دا موضوع بنرجع ليه تاني.
· لكن انتوا يا اسامة عطا المنان قروش التذاكر للعودة ما عاوزين تدفعوها.
· ويقولوا ليك المنتخب الوطني.
· مفروض تاني ما في زول يلوم ليه لاعب (وطني) .. اذا كان الاتحاد العام يتعامل بهذه الصورة.
· لمن تمشي تمرين الصباح وتاني ترجع تمشي تمرين العصر .. في بلاد فيها زحمة تقيلة .. بكون عندك مشكلة في الوقت وفي الكتابة.
· مباريات الهلال القادمة امام عزام وامام سيمبا سوف تكون عند السابعة مساء.
· المباراة ح تنتهي تسعة .. والعودة الى الفندق في هذا التوقيت عاوزة ليها ساعتين.
· يعني يا بابكر مختار ويا ضمرة ومخاوي خليكم عارفين.
· ابقوا ناس سهر بس.
· ……………..
· ترس اخير : جارجو دا قبل ما يتجنس بعمل كدا .. وقت يتجنس يعمل شنو؟


اترك رد

لن يتم نشر عنوان بريدك الإلكتروني.