محمد عبدالماجد يكتب: منتظرين (ملعب) الهلال و(مشاطيبه)

• ناس المريخ قالوا ايمن ابوجيبين رفض اعتذار عماد الصيني ، واعلنوا عن ذلك في صحيفة الصدى.
• زول فسخ عقدو .. هل يمكن ان يعتذر؟
• الصيني لو بعتذر ما كان من الاساس فسخ عقدو.
• لو بعتذر كان اعتذر للنفطي.
• بعدين انتوا يا ناس المريخ وقت عندكم (العزة) دي كلها .. منتظرين استاد الهلال مالكم؟
• ما خليتوا (واسطة) و(مجلس سيادة) و (دعم سريع) عشان تلعبوا في استاد الهلال .. وبرضو ما في طريقة.
• بقت على الصيني يعني!!
• الاتحاد العام لكرة القدم السوداني ..الصراعات دائرة بين طه فكي واسامة عطا المنان. والخلاف بين الشركة الراعية والاتحاد و اسامة عطا المنان ظهرت على السطح. والمنتخب يعاني من شح المال في الجزائر.
• ورئيس الاتحاد العام ترك كل هذه المشاكل وقائم ليه بمبادرة من اجل الوطن .. عشان المريخ يلعب في استاد الهلال.
• ما بعرفوا (الوطن) إلّا في الحالات الزي دي.
• وين كانت هذه المبادرة؟ عندما لعب المريخ الموسم الماضي في القاهرة عشان يضر الهلال ويخدم حظوظ الاهلي المصري حسب الاتفاق الذي اعلن عنه الجاكومي في تسريب صوتي.
• الاتحاد العام الذي اعلن عن مبادرة من اجل الوطن .. رفض قرار لجنة الانضباط واوقف عماد الصيني بعد مضى اكثر من (4) شهور من مدة الايقاف ، حيث رفضت لجنة الاستئنافات تعليق العقوبة وهي التى حولت عقوبة صلاح نمر الذي اعتدى على الحكم صبري محمد فضل من (6) اشهر الى (6) مباريات.
• (6) شهور عادي عندهم تصبح (6) مباريات.
• اين احترام السلوك هنا ؟ و(متصعب) عبدالسلام بعرف فقط يتكلم عن احترام العقود.
• كدا في الاول احترموا (عقدكم) مع الشركة الراعية … او خلوا الشركة الراعية تحترم عقدها معاكم.
• بقت على الصيني!!
• المريخ الذي يتحدث عن (السمكرة) في تسجيل امهر الطاهر ، وعن الضربة التى وجهها الاتحاد للهلال برفضه لقرار لجنة الانضباط الذي علق عقوبة الصيني .. ينتظر بعد (الفصاحة) دي كلها ان يلعب المريخ مبارياته في مرحلة المجموعات في استاد الهلال.
• في (سمكرة) اكتر من ان يلعب المريخ في استاد الهلال.
• بتوسلوا.
• وبترجوا.
• وبعملوا في المبادرات من اجل الوطن.
• مباردة من اجل الوطن مع منو؟
• مع (العسكر).
• كل دا ليه؟
• عشان المريخ ما يلعب في جوبا .. او يلعب في ليبيا.
• المريخ كله عاوز يقطع الزلط .. عشان يلعب في العرضة شمال.. ورافضين الصيني يقطع الزلط.
• ابوجيبين الذي رفض الاعتذار … هو ذاتو قطع الزلط.
• بقت على الصيني يعني!!
• ويأتوا بعد الكلام دا ويقولوا ليك ايمن ابوجيبين رفض اعتذار الصيني.
• وابوجيبين قبل اعتذار الجاكومي حتى دون ان يعتذر بعد ان كسر طبلة استاد المريخ .. مرتين وليس مرة واحدة.
• بقت على الصيني.
• الجماعة الذين رفضوا اعتذار الصيني .. اتخيلوا راجيين شنو؟
• راجيين مشاطيب الهلال.
• لغاية الآن تقرير ريكاردو ما طلع .. في انتظار (مشاطيب) الهلال.
• ما تسمعوا الكلام بتاع المحترفين البرازيليين.
• الناس ديل عشمهم بس في (مشاطيب) الهلال.
• طموحاتهم.
• تطلعاتهم.
• احلامهم.
• آمالهم في تجاوز المجموعات.
• كل هذه الاشياء مرتبطة بمشاطيب الهلال وقدرتهم على التعاقد معهم.
• الهلال لمن تأخر في (الشطب) … الجماعة غرفة تسجيلاتهم اتململت.
• ريكاردو قال ليهم احتياجات المريخ بحددها بعد ان يحدد الهلال (مشاطيبه).
• بعد الكلام دا .. بتكلموا عن رفض المريخ اعتذار الصيني.
• انتوا الصيني تلقوه وين؟
• الهلال مفروض يشكر عبدالكريم النفطي … نحن مفروض نشكر غازي الغرايري على (الهدية) التى قدمها المريخ للهلال.
• لاول مرة المريخ يقدم (هدية) للهلال.
• هديتنا ورجعت لينا.
• واضح ذلك من خلال الفرحة العريضة التى عاشتها جماهير الهلال بتوقيع الصيني في كشوفات الهلال.
• شوفوا الزول وقت يرجع من غربة ويعود من سفر .. اهلو بفرحو بيه شديد.
• الصيني رجع لي بيتو.
• عاد الى الديار الزرقاء.
• العودة دي بتخلينا اتخيل وسط الهلال بعد انضمام عماد الصيني للهلال.
• صلاح عادل وعماد الصيني مع ووالي الدين خضر بوجبا .. (رسالة) ما بتفوت.
• فشل في الارسال.
• ديل (فكرة) ساكت ما يتمر منهم.
• الجميل في الصيني انه صاحب اسلوب بختلف فيه عن لاعبي الوسط في الهلال.
• صلاح عادل عندو اسلوب يختلف عن الصيني .. واسلوب الصيني بختلف عن بوجبا.
• عبدالرؤوف طبعا براهو .. واجاجون مختلف.
• تعدد الاساليب بمنحك تعدد في الطرق وتعدد في الفرص.
• اهم مميزات الصيني تتمثل في انه لاعب (رشيق) … خفيف في الحركة وسريع في التفكير… وممتاز في التمرير الطويل.
• وهو يتميز ايضا باللعب القانوني العنيف.
• (الشفتنة) مهمة في الكورة.
• وسط الهلال بالطريقة دي قلنا ليكم سوف يكون منطقة (ضرب نار).
• الكلام دا بحصل عكسه في المريخ.
• المريخ سوف يتعاقد مع صانع العاب برازيلي.
• برازيلي يلعب ليكم كيف مع (الاسود الضارية) دي.
• برازيلي يلعب في استاد عطبرة؟
• انتوا جنيتوا!!؟
• يلعب ليكم في شندي؟
• انتوا ما عندكم رأس؟
• كوبر ما بقدر يلعب فيها.
• اتجاه المريخ في تعاقداته للاعب البرازيلي سوف يقدم خدمة كبيرة للهلال.
• الجماعة ديل ما بقدروا يثبتوا مع صلاح عادل وعماد الصيني.
• عاوزين نشوف لينا مباراة للهلال تجمع بين هذا الثنائي.
• اي مباراة تجمع بين هذا الثنائي .. سوف يكون فيها (صانع ألعاب) مفقود.
• القنصلية البرازيلية اوعكم تقولوا لينا ح تدخل.
• هذا الثنائي يمكن ان يجتمع في مباراة الهلال القادمة امام صن داونز.
• جمهور الهلال سوف يكون في انتظار هذه المباراة.
• اما مباراة الهلال والاهلي المصري في الجوهرة الزرقاء سوف تكون (حكاية تانية).
• تذكروا علاءالدين يوسف في مباراة الهلال والاهلي المصري التى انتصر فيها الهلال على الاهلي بثلاثية نظيفة؟
• الصيني سوف يعيد لكم ما فعله فييرا في تلك المباراة.
• ناس الاهلي ح يشوفوا (الجحيم).
• صلاح والصيني.
• غايتو ناس الخارجية لو مسّكوا الصيني ملف (حلايب) .. ممكن الصيني يعيد (حلايب) من خلال اللقاء الذي سوف يجمع بين الهلال والاهلي في ام درمان.
• حلايب (سودانية).
• والصيني قال بحسم الكلام دا في مباراة الهلال والاهلي القادمة في 17 فبرائر في (المقبرة).
• ما عاوزين الجمهور يتشحن .. او يأتي للمباراة تحت ضغط.
• عاوزين الجمهور كله يكون بدون ضغوط وبدون توتر.
• لمن المشجع يكون (متوتر) .. اللاعب برضو بكون (متوتر).
• الاهلي المصري بعرف يستفيد من (توترنا).
• عشان كدا ما عاوزين نتوتر.
• عاوزين الهلال يلعب كورة.
• من هسع عاوزين نرتب اوضاعنا لهذه المباراة.
• ننتظر فقط ان يكمل الهلال تسجيلاته ويضم العناصر (الاجنبية) لكشوفات الفريق .. عشان ننتقل الى مربع اخر.
• ونبقى على (خ 910).
• تأخر التسجيلات ليس في صالح الهلال.
• الهلال سوف يبدأ تجمعه يوم 20 يناير.
• يعني بعد اقل من 48 ساعة.
• ولسه صفقات (المحترفين) لم تحسم.
• المحترفون يفترض ان يكونوا حضور في اول مران للهلال بعد الراحة.
• الهلال سوف يسافر الى جنوب افريقيا يوم 26 يناير .. مهم ان يدخل اللاعبون المحترفون الى السودان في هذا التوقيت .. عشان ياخدوا فكرة عن السودان.
• (4) تمارين او (3) في السودان قبل السفر الى جنوب افريقيا يمكن ان تعطي اللاعب المحترف فكرة كافية عن السودان وعن الهلال والاجواء.
• هذا الامر سوف يساعدهم في مواجهة الاهلي المصري.
• اسبوع واحد يفصل بين مباراة الهلال امام صن داونز في جنوب افريقيا ومباراة الهلال امام الاهلي المصري في ام درمان.
• لذلك نقول مهم جدا .. ان يتدرب المحترفون مع الهلال في ام درمان قبل السفر الى جنوب افريقيا.
• ……………
متاريس
• الهلال سجل الصيني.
• المريخ شطب بكري المدينة.
• بكري المدينة ذنبو شنو؟
• ابوجيبين الظاهر عليه كان منتظر بكري المدينة برضو (يعتذر).
• الناس ديل رائح ليهم (اعتذار).
• انضمام اي لاعب برازيلي للمريخ .. اضافة للهلال.
• برازيلي المريخ الجديد …في عشر سنوات سجل ليه (20) هدف.
• حالتو صانع ألعاب!!
• يعني في السنة بسجل هدفين.
• بانغا لمن جاء للهلال كان مسجل اكثر من هذه الاهداف.
• برازيلي بهذا التواضع لا يمكن ان يلعب في استاد الهلال.. ناهيك عن الهلال.
• نجيلتنا ما بتقبل الكلام دا.
• ………….
• ترس اخير : المطرة ماشه عليكم.