زاهر بخيت الفكي يكتب: أنا منكُم..!!

ليلة باردة
وليها زيف
اتلمَت الناس فى البيوت
فيها الطريق أصبح نضيف
لا حركة فيهو ولا مرور
ارصادنا حذَروا من برد
قالوا ما تمرُق خفيف
في يومنا داك
الصدفة ساقتنى الفجُر
للمشفى شان أسعِف مريض
قول يا لطيف
شُفت كان منظر عجيب
كرتونة واكوام من وسخ
يا حاج أنا
راقد هنا
يا خال أقيف
ما تمسحني يا خال بالأرض
يبقى الأجل
تحت العجل
قول يا لطيف
بِسمِلة مالك يا جنا..؟
بردان أنا
جيعان شديد
أدينى يا خال شان أجيب
رغيفة أسكِت بيها جوع
معاها كباية حليب
اسمك منو..؟
أمى سمتنى الحبيب
موجودة وين..؟
ماتت هنا
قبل ما يشوفا الطبيب
شالوها ناس الخير وفاتوا
فاضي جابوا العنقريب
خلتني يا خال للعذاب
لا عمّة لا خالاً حبيب
وين فات أبوك..؟
عرّس قريب
خلاني غاب
لى واحدة تانية بلا قلب
ورتني ألوان من عذاب
خلتني عايش زى غريب
جيت أشُم ريحة أمي قائل
من عيني ما وقف الصبيب
سمُوني مُتشرّد أنا
شماشي بس
أنا منّكُم
من دمّكُم
أنا زيّكُم
القسمة يا خال والنصيب
خلتني نكرة بلا إسم
أمي سمتني الحبيب