بابكر سلك يكتب: الاتحاد الغاني يعاقب الاشانتي

*امس لما جيت انوم
*قريت البقرة وآل عمران
*وصليت علي الرسول الف مرة
*استغفرت ونمت
*وانا نايم
*رأيت ليك في منامي مانشيت عريض يتصدر الصفحة الاولي لصحيفة رياضية محترمة
*الاتحاد الغاني يعاقب الاشانتي ويقصيه عن دوري اشبال غانا
*في نومتي ديك
*وفي تلك الرؤية جريت لي تحت اشوف السبب
*لقيت ليك السبب هو انسحاب الاشانتي من دوري اشبال غانا بغيابه عن مباراتين نسبة لتسفير فريق الاشبال للسودان
*فتحت الاذاعة الرياضية اف ام ١١٠٤ بتاعت غانا
*سبحان الله لقيتهم بتكلموا في نفس الموضوع
*وقالوا اشبال الاشانتي قدموا استرحام
*قالوا فيهو نحنا نقر باننا مشينا السودان
*لكن واللاتي والعزة مالعبنا ضد سوداني
*لعبنا ضد الاتحاد الافريقي
*وتاني مابنكررها
*ايها الناس
*انا متأكد اني نمت علي طهارة وتسبيح وصلاة علي اشرف المرسلين
*،يعني الحصل ده رؤية عدييييييل
*المهم
*لجنة الاسناد والدعم الجماهيري ورابطة تشجيع المنتخبات
*تقوم بأعمال كبيرة وجليلة
*وترفع راية القومية
*هي رابطة ضد التعصب السالب
*ستقود من المدرجات تشجيع جميع المنتخبات
*وستقود من المدرجات تشجيع جميع الاندية التي تشارك افريقيا وعربيا باسم السودان
*هدفها الاول نشر الوعي الجماهيري وتفعيل الحس القومي
*فيها ايه لو الهلال جاب كاس افريقيا؟؟؟
*ماذا يضيرنا في المريخ؟
*ويحصل ايه لو المريخ عملها تاني؟
*الهلال بموت؟؟؟؟
*فكونا من تحطيم الآخر وخلونا نتعصب ايجابا ونعمل علي النهوض بانديتنا دون التفكير في تحطيم الآخر
*زمن الشماته الغير مفيده انتهي
*يمكن ان يكون الامر في حدود مداعبات محترمة وبريئة
*لكن ان يصل الحسد لدرجة التمني بفناء الغير
*ده ماسلوك الوسط الرياضي الاتربينا عليهو
*امدرمان دي شالت في قلبها المريخ والهلال والموردة بكل حب واحترام
*والتنافس الشريف داخل الملعب يصل قمته
*ولكن الاحترام موجود في ظل المناكفات البريئة
*اكسر استادك
*تكسر استادي
*ده كلام ماكنا بنعرفوا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت ياوالينا
*قومية بتعني لينا
*ديمقراطية تساوينا
سلك كهربا
ننساك كيف والكلب قال يجيب القون الغربال يجيبو الصاوي يجيبو الخصم في نفسو هو هدف للسودان يجب ان يفرحنا جميعا…المنتخب ده كان اسمه الفريق القومي
والي لقاء
سلك