بابكر سلك يكتب: أبوجا كاتفاقية فشل..

*الإخوة الأهلة زعلانين من حارسهم ابوجا
*ولما قون هلال الساحل الأول الشايتنوا من (ترب هدل) دخل مرمى الهلال
*جماهير الهلال طالبت باستقالة العليقي وانسحاب السوباط وعودة فطومة أختي وشطب ابوجا
*وقعدوا يهتفوا
*والله ما بنرجع إلا فطومة ترجع
*قدر ما حنسناهم وقفوا لمبة
*أبوا كلو كلو
*بعد تعب قالوا خلاس نخلي العليقي
*خسمناهم بالرسول
*قالوا خلاس خلوا السوباط
*قلنا ليهم ذوالقعدة والأيام المباركات
*قالوا خلاس فطومة أخت سلك ما ترجع
*وقعدوا يهتفوا
*خلاس بنرجع وفطومة ما ترجع
*تاني حنسناهم
*قالوا موضوع ابوجا ده مابنتناقش فيهو نهائي
*شطب بس
*يا اخوانا الود صغير
*قالوا ده كان كبر بكبرها وبودينا الليق
*قلنا ليهم أسي أبو عشرين ما كبرها
*الحصل شنو؟
*المهم
*أصروا على شطب ابوجا
*ونحن فترنا من التحنيس
*قمنا قلنا ليهم
*ابوجا كاتفاقية فشل تجيبوهوا حارس؟؟؟
*المهم
* السيستم فااااتح
*لكن ما شفنا زول دخل
*فاتح على مصرعيه
*زول هببو لينا مافي
*أصلنا كده
*لي يوم تلتين رمضان المغرب
*ما بننضف للعيد
*إلا يذيعوا العيد
*ما بنمشي صلاة الجمعة
*إلا نسمع الإمام دخل في اللهم واللهم وقوموا إلى صلاتكم
*العروس
*العروس البعرسوها دي
*ما بتجي الحفلة إلا في الأغنية الأخيرة
*وهي شن الغنية
*تحضر الحفلة من قولة تيت لي نهايتها
*بيت شعر ما بتسمعو
*الدنب لوب لوب لوب
*والأورغن وجنقن وجنقن
*والفنان بحري أم درمان الديم أوووو كلاكلات حاج يوسف أم بدات الصافية العرضة
*ما تعرفو فنان ولا طراح مواصلات
*المهم
*تمضي الأيام
*ونتزنق
*ونلقى التورتات كملت
*نضطر نجيب بسكويت معتت وزلابية بايتة
*ونسجل واحد أشتر وواحد سعران وواحد عندو مصران
*ونشبك ليك الناس
*التايلندي خطير
*البوركيني مبالغة
*والتشادي قنبلة
*وسماحة الزول في الطول والعلا
*بس الخوف في أول تمرين يرجع فيهم القريدر يلحقهم أمات طه
*القريدر ده أشتر خلاس
*ما حصل رجع في حاجة وقفت حيلها
*لو فيها سيخ أو فيها هندوس
*المهم
*كبار المريخ لسه ماوصلوا لحل قانوني ملزم ومقنع ؟؟؟؟
*ملزم للجميع ومقنع للفيفا
*يسويها الله عاد
*نحن غير القانون والالزام والالتزام دايرين شنو عاد؟؟؟
*لكن الموضوع ما خطير
*بالذات ونظام المريخ الأساسي هو نظام ٢٠١٩ (القالوا ما مجاز في البدء) المؤكد في أكتوبر ٢٠٢٠ (القالوا تلك الجمعية ما ياها) المعدل في ٣١ يوليو ٢٠٢١ (تلك الجمعية بتاعت جنة الأطفال حسب الزعم)
*القصة ما خطيرة
*ولا دايره درس عصر
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*لو دورت في الدمازين وكسلا ونيالا ومدني والجنينة وبورتسودان الحنينة وأم جمينا
*مدنية ما بتخلينا

سلك كهربا

ننساك كيف والكلب قال مدنيااااااااو
وإلى لقاء.


Leave A Reply

Your email address will not be published.