بابكر سلك يكتب : نقل الممتاز ونقل الملاريا..

*أيام الكيزان الباعوض كتر
*وكعادة الكيزان في التبرير الفطير
*خرج علينا مسؤول ليقنعنا بقوله
*صاح الباعوض كتير لكن النوع ده ما بنقل الملاريا
*فمات الناس بالملاريا وبالمحاليل الوريدية الفاسدة
*ولا زال المسؤول وقتها يبرطم بكلمات تضحكنا قبل أن تبكينا
*فوقتها الضحكة من أعماقنا كانت ثورة بتبدد الحزن الكتلنا
*أيها الناس
*نقل الممتاز بالتمنية كاميرات والهرطقة التي سبقت التعاقد
*بذكرنا بقصة الباعوض البنوني ويعضي وما بنقل ملاريا
*النيلين نقلت أي شي
*حتى الملاريا نقلتها بكل أنواعها حبشية وعادية وبالجنزبيل لكل من جلس أمام (بلاعتها) أقصد شاشتها
*ولكن ناس النيلين صدقوا لما قالوا لينا إنهم حا ينقلوا (الملاريا) أقصد الممتاز بتمنية كاميرات
*هو بيني وبينكم الممتاز ذاتو ما ياهو الملاريا المن أمها؟
*المهم
*نقلوا لينا بتمنية كاميرات
*كاميرا ناقلة الشوط التاني
*وكاميرا ناقلة في نفس اللحظة صوت الشوط الأول
*وفي نفس اللحظة كاميرا تالتة ناقلة دعاية زيوت ناشونال
*الكاميرا الرابعة ناقلة الاستوديو التحليلي
*أما الكاميرا الخامسة فكانت متفرغة لنقل (غياب) الجماهير عن المدرجات
*السادسة والسابعة قاعدات زي عدمن
*ملاريا ما قدرن ينقلنها
*أما الكاميرا التامنة فكانت ناقلة فاخورة الزول البقوم ويقعد بدون سبب داك
*تمنية كاميرات بالتمام والكمال
*شكرا للنقل المتفرد
*علي الطلاق زول في العالم بنقل كورة بي طريقتنا دي مافي
*تفرد يميزنا عن العالم كلو
*أها
*نرجع لكورة أهلي مروي
*كان الأداء من جانبنا ما بطال
*تشعر إنو في شغل
*ساعدنا على ذلك المستوى المتواضع الذي ظهر به أهلي مروي
*وظاهرة إضاعة الشبل الجزولي للأهداف تحتاج لوقفة من الجهاز الفني
*فالفرع إن قام معوووج بعد يكبر ما بنعدل يا غرايري
*المهم إنها خطوة نحو البطولة تنتظر تعثر الهلال
*وتعثر الهلال في ظل التحكيم بتاعنا ده ضرب من ضروب المستحيل
*لكن الله في
*أيها الناس
*التاج يعقوب يحتاج للمشاركة الدائمة لأنو أحق الناس بها
*التاج من أحرف اللاعبين
*وود الرشيد متين يقتنع بأنو الزول ما بلوك الكورة لبانة
*كرشوم أدى الخانة بريق
*برغم الحاجة له في قلب الدفاع في المواجهات الكبيرة
*أيها الناس
*ما هي أسباب مقاطعة الجماهير للمدرجات؟
*السؤال محول للاعبي الممتاز وأجهزتهم الفنية
*فإذا كان جمهور الكرة متابعا جيدا للدوريات العالمية
*قطعا سيقاطع المستويات المتواضعة لفرقنا
*وتبقى القصة زي قصة العلاج
*كلو زول يلملم أطرافو ويا مصر جاك زول
*اقتنع الناس بعدم جدوى العلاج بالداخل
*فالطبيب المستر والفكي وخبير الأعشاب
*كلهم أصبحوا في نظر المريض واحد
*وفي نظر المرض هم الفشل في العلاج
*فعشان ما يتحول الجمهور للشاشات
*حقو نطور مستوياتنا شوية
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*جلود الأضاحي بدل دولار تجيب لينا
*بقت آفة زادت على البلد ضبابينا

سلك كهربا

ننساك كيف والكلب قال يا بلد عريان مسولب رغم خيرك وغيرك اللابسين هدومك
وإلى لقاء.

 

Leave A Reply

Your email address will not be published.