طارق محمد عبد الله يكتب: طيش المستحيلات ..!!

& ده مدرب شنو ده ياسوباط …؟؟ مدرب اقل من قامة الهلال حافظ ليهو طريقة لعب واحدة (فرمالة ) بتواجه فريق انت متقدم عليهو بثمانية نقاط كاملة يعني التعادل والفوز الاتنين يصبوا في مصلحتك تلعب بثلاثة مهاجمين ومحور واحد الله لاكسبك ، ليه اجاجون وعبد الرؤوف في مباراة كل المطلوب فيها تجنب الخسارة وعليك الله ياموتا يا زفت الطين صلاح عادل جاهز وحسن متوكل جاهز تبدأ بي حسين النور محور واحد ياخ اي مدرب حتى ولو ماعندو شهادة وفق معطيات المطلوب تحقيقه من المباراة ما ممكن يلعب بالتشكيلة البديت بيها دي والله عمليتك دي محسن وبرهان مايعملوها ..!
& موتا وخراب ديار مدرب لا يشبه الجوهرة المفخرة ولا حتى بص الهلال فكونا من المشروع وما المشروع البرتغالي الوهم ده مازول مشاريع وياعليقي والله الزول ده مفروض يصبح الواطه عند اهلو هناك والسؤال البرتغالي اب رويس غليد ده نفسي افهم مشرف وأتارا افضل مدافع هلالي ليه وعشان شنو ودفاعنا كلو مولع اخضر معقول الطيب وبأنقا في قلب الدفاع والاتنين البطء قاسم مشترك أعظم بينهم وواتارا صراحة افضل من الاتنين مجتمعين ياخ مشاركة الثنائي المرح معا يعني تقديم الدعوة لأي خط هجوم اتفضل الطريق فاتح نحو مرمى الهلال ياخ كورة ترتد من الحارس جوه منطقة الجزاء لجدو رمضان تلقاه واقف براهو خالص أين الطرف الأيمن حينها معقول ده شكل تنظيم دفاعي يليق بسيد البلد وزعيمها الاصلي …؟؟
& مدرب المريخ الجاء أول أمس ده لعب بواقعية شديدة كثف اللاعبين في منطقة المناورة ونجح في قطع الامداد عن المقدمة الهجومية الهلالية بالسيطرة على مفاتيح اللعب في فرمالة موتا اجاجون وروفا فأصبح هجوم الهلال معزولا عن باقي الخطوط مما أجبر الأزرق على الارسال الطويل والكرات العالية وهنا جاء تفوق المريخ جراء طول قامة مثلث الدفاع كرشوم ، نمر بالإضافة إلى بخيت خميس ولو ادخل حسن متوكل منذ وقت مبكر وعيد لتغيرت نتيجة المباراة تماما ولكنه موتا وخراب ديار والسؤال منذ متى كان فاقد الشيء يعطي مساعد ياي لاعندو فكر ولاشهادة قاعد راجي شنو ياعليقي…؟؟
& موتا وخراب ديار نفخ الروح في جثة الوصيف الهامدة وإعطاهم فوز كان بالنسبة لحالهم المائل اكثر من برج بيزا من طيش المستحيلات وليس رابعها فقط لاغير الله لاكسبك انت برتغالي من كوع الباعوض اطردوا هذا المدعي فورا واكملو الموسم باحد أبناء الهلال حتى لا يضيع الدوري الممتاز …!!
اهداف سريعة ..اهداف سريعة
& الضل دخل المباراة بثلاثة فرص تتيح له المحافظة على وصافته الدائمة.
& ونجح بفضل خرمجة موتا وخراب ديار في الفوز والمحافظة على الوصافة التي على مقاسه تماما .
& قبعات الاحترام والتقدير نرفعها ناطحة سحاب للون الدم ابو عشرين حبيب الملايين .
& بسالة وجسارة وحرارة قلب تشبه روح الفنلة الزرقاء تماما .
& وليت ألتراس الأزرق يلتقط القفاز ويقوم بتكريم لون الدم الوفي في التمرين القادم للهلال.
& وبصراحة شديدة ولولا بسالة ابو عشرين حبيب الملايين لخسر الهلال المباراة منذ شوطها الأول.
& سادتي الهلال افتقد جيرارد فيري ووسط الهلال الحالي ليس به لاعب مقتدر يربط الدفاع مع الهجوم .
& لاعب وسط متمكن ورأس حربة صاقعة وطرف يمين نار منقد هي مطلوبات تسجيلات الهلال القادمة ياعليقي .
& ومهما حدث يظل الهلال الرقم الصحيح في كرة القدم السودانية وغيره الكسور والبواقي .
& ازرق وابيض لون الفل هلال القمة حبيب الكل .
& واخيرا احمد الله كثيرا انني حي ازرق .

 

Leave A Reply

Your email address will not be published.