بابكر سلك يكتب: الزوباط..

*إن كان للهلال سوباط
*فنحن لنا زوباط
*زبط زي الزبط
*مشاكلنا كتيرة
*ومافي حل إلا في البل
*وبليناهم
* هو بل نصاح
*اسكت بس
*الجفلن كان غيرن أبوجا لأبو تلاتة وتلتين
*لكن بصراحة كنا محظوظين
*لأننا قابلنا في المباريات السابقة أندية قوية
*زي توتي مثلا
*ووادي نيالا
*دخلونا في فتيل
*لدرجة هزت ثقة الجماهير في اللاعبين
*لكن القرعة بارك الله فيها
*رمتنا مع فريق ضعيف القدرات والمقدرات طويل اللسان شلولخ
*وشلخناهو ليك
*كانت مباراة أعادت الثقة بين الجماهير واللاعبين
*وبرغم ضعف الخصم الفني والمهاري
*إلا أنها كانت مباراة أظهرت بعضا من إمكانيات الجهاز الفني التونسي
*وإن كانت هناك حسنة لمجلس الإدارة السابق
*فهي استجلاب هذا الجهاز الفني
*لهم التحية على ذلك
*وعلى مجلس الإدارة الحالي أن يعمل علي الحفاظ على هذا الجهاز الفني
*لكن
*قون رمضان عجيب عجب
*أقصد قون رمضان عجب عجيب
*وحتى قون كرشوم الما جاء كان قون جميل
*والأجمل من كده أن يخسر الهلال في أحسن حالاتو بهدف من المريخ في أسوأ حالاتو
*وقون رمضان حلاتو
*والأحلى من كده الجزولي نوح
*الشافع مثبت تلاتة
*تلاتة يا مفتري!
*أيها الناس
*افتقدنا فطومة أختي
*لأنو كيس مدربهم ده شايلو الهوا ليهو تلاتة شهور
*ومافي زول قادر يقول كيسو طار
*أيها الناس
*نطالب الاتحاد بإعادة المباراة
*لأنو الغرايري داير يصحح الأخطاء
*وكان لحق صحح الأخطاء
*على الطلاق
*ستة ما تحلكم يا محمد عبدالماجد
*فريق ضعيف
*فريق محتاج لتسمين
*محتاج عافية
*ياخ المحل الشات منو ود نوح ده
*لو شات منو لاعب جعان
*أبوجا كان قبضها
*ده لو وصلت لي أبو عشرين
*وأبوجا نفضها نفضة نملة أم ريش
*وتعال شوف العض
*أبوجا منبرش
*فارس ينكرش
*والجماهير الواعية تهتف للثورة
*فنحن والهلال في خندق واحد
*خندق الثورة الكبير
*انتهت الكورة
*والثورة مستمرة
*أيها الناس
*إنه نصر نهديه للحبيب الشايقي الذي تماثل للشفاء وشرف التمرين الختامي
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*بعد الكورة كان الهتاف اللينا
*نحنا الشعب نحنا القوة
*جايين القصر جوه يا والينا

سلك كهربا

ننساك كيف والكلب قال رمضان في الضحية !!!!
وإلى لقاء


Leave A Reply

Your email address will not be published.