بابكر سلك يكتب : أم ضبيبينة

*بدأت حجوة أم ضبيبينة بالمريخ بمجرد ما شرع المريخ في صياغة نظامه الأساسي الذي يقوم على موجهات ومتطلبات الفيفا
*لسه النظام الأساسي ما تم عرضه على الناس بدأت معارضته
*في ناس عارضوا وهم ما عارفين معارضين شنو
*بس أحسن الناس أحسنا
*مرة قابلت واحد من ناس إن أحسن الناس ديل
*قلت ليهو انت معترض على شنو في النظام الأساسي ؟؟
*ما عرف الإجابة لأنو واحد من (المسيوقين) بالزلط
*بالزلط ما بالخلا
*لأنو في ناس مسيوقين عديل بالزلط
*المهم
*بعد إجازة النظام في 2019 قابلت واحد تاني من المعترضين
*قلت ليهو انت معارض النظام الأساسي ده ليه؟
*قال لي الجمعية الأجازتو نصابها ما كان تامي
*قلت ليهو لكن انت معارض قبل قيام الجمعية غير مكتملة النصاب دي
*ما عرف يقول شنو
*لأنو النغمة في الأيام ديك كانت النصاب ما تامي
*المهم
*نظام 2019 أكتر نظام أساسي وجد حظه من التداول بدءا بنادي الشرطة (كان في تحريض على عدم الحضور) ومرورا بلقاءات وندوات تناولته لدرجة الملل
*وكل ذلك ما جاب مريسة تام زين
*لأن البعض كان يعارض النظام الأساسي باستراتيجية ولأهداف يعلمها هو
*وبرغم كل ذلك مضى نظام 2019 وتخطى كل تلك العقبات والعراقيل
*وجاءت بدعة تأكيد النظام الأساسي
*وتمت في أكتوبر 2020
*وتم انتخاب بعض اللجان عدا لجنة الحوكمة
*اجتمعت لجنة الانتخابات المنتخبة
*واستعملت سلطاتها بموجب النظام الأساسي
*وأصدرت قرارا بإنهاء أمد مجلس سوداكال
*وتعيين لجنة تسييرية لمدة ستين يوما أكبر مهامها الإعداد للانتخابات
*وتم إعلان تلك اللجنة (بعد مشاورتها طبعا)
*وفوجئنا نحن في لجنة الانتخابات بتصريحات أغلب من اخترناهم التي جاء فيها أنهم مافي زول كلمهم ولا في زول استشارهم
*وعلي الطلاق كلمناهم ووافقوا
*بل أحدهم قال دخّلوا معاي فلان وفلان أنا محتاج ليهم
*هو وفلان نكروا حطب
*لأن التوجيهات الجاتهم رفض ذلك القرار لأن الموافقة عليه تعتبر اعتراف بنظام 19 المؤكد في 2020
*ودي في حد ذاتها هزيمة ليهم
*اختيار اللجنة كان عن طريق القوائم الست التي تم رفعها للاتحاد لاختيار لجنة تطبيع
*الزول البنلقاهو في ست قوائم أو خمس أو أربع، بنعينو
*المهم
*قامت الدنيا ورفضت القرار
*وجاءت جمعية تعديل النظام الأساسي
*ديل جمعيتين
*واحدة في مارس 2021
*والتانية في 31 يوليو 2021
*هنا الكلام الكتير ما حبابو
*كاس قالت النظام سيد الرصة والمنصة هو نظام 2019 المؤكد في 2020 المعدل في 31 يوليو 2021
*يعني تعديل يوم المسرح العالمي كان تمثيلية وانتهت
*وانتهت مع كل تلك التمثيلية إسكتشات اللجان والانتخابات ومللوج مجلس حازم
*طيب النظام سيد الرصة بموجبو تم انتخاب اللجان
*وبموجبو اشتغلت تلك اللجان
*وعملت انتخابات
*أسفرت عن مجلس
*كل تلك الإجراءات لم يطعن فيها طاعن لانشغال الناس بإسكتشات يوم المسرح العالمي
*دي قصة أم ضبيبينة باختصار
*وحتى بعد قرار كاس
*أم ضبيبينة شغالة بين (إيال هامد) و(إيال أند الرحين)
*والعاقل يفهم
*أيها الناس
*كاس قالت مجلس حازم ما شرعي
*تاني الممسكو المريخ شنو؟؟؟؟؟
*تكون أم ضبيبينة يا ربي!!!!
*أيها الناس
*الشايقي يحتاج لدعواتكم
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*بتضيعنا حجوة أم ضبيبينا
*نعقل ولا نقول يا فيفا جمدينا؟

سلك كهربا

ننساك كيف والكلب قال قولوا يا فيفا جمدينا بس ما تقولوا يامطيرة صبي لينا في عينينا….لو صبت حفرتكم الكاشفة دي بتكشف حالكم
وإلى لقاء.


Leave A Reply

Your email address will not be published.