عصام هجو يكتب : (قاعدين ليه ماتقومو تروحو …وياعمار أشعلت النار)

*درجت جماهير كرة القدم في كل الدنيا عندما يتقدم فريق على اخر بنتيجة 3 صفر فما فوق أو بخماسية كما حدث للهلال بأرضه ووسط جمهوره من مازيمبي وكما حدث للهلال أيضا من الزمالك أيام الحارس احمد عبدالرازق وكما حدث للهلال أيضا من سانت جورج الاثيوبي بالتسعة وكما حدث لابوالهل ذات نفسه من الترجي التونسي بنصف دستة كاملة مكملة بحضور ترباس بعمامته وعدد مرات شراب مويته واحقاقا للحق كانت خارج المعبرة والشاهد في الموضوع أن جماهير الفريق المنتصر تهتف لجمهور الفريق الآخر المهزوم قاعدين ليه ماتقوموا تروحوا يعني حارسين شنو تاني بعد الخسارة الكبيرة فمن الأفضل أن تتركوا المدرجات وتغادروها لأن إستمراركم أصبح في الفاضي ليس منه فائدة ووجودكم من عدمه أصبح سيان مافي فرق.
*طيب الآن إدارة نادي المريخ الحالية ينطبق عليها هتاف قاعدين ليه ماتقومووووا تروحووووا مادام الجماهير إستنجدت بجمال الوالي للتجديد مع عمار طيفور ومادام الدعم السريع تكفل بإعادة بناء الاستاد ومادام كل قروبات المريخاب شغالة نفرات وتبرعات لأجل إعادة الانارة وإعادة بناء الاستقبال وتشييد السور واعمال الطلاء بالاحمر والاصفر والتنجيد وجماهير أخرى تستعد هذه الأيام للتكفل بمسجد نادي المريخ طيب بعد دة كلو (قاعدين ليه ماتقومو تروحو) قاعدين عشان تدفعوا مرتبات الجهازين الفني والإداري برضو كمان ماجاية ومامبلوعة ومامهضومة تكونوا مجلس إدارة نادي المريخ بالتجزئة وبالتقسيط المريح.
*يعني ممكن نقول على مجلس الإدارة الحالي فقط لإستبدال المدربين وعددهم 4 مدربين في أقل من 6 شهور ومجلس إدارة للتعاقد مع المعطوبين والمصابين ويحق لنا ان نقول عليهم ا(اسكراب) طالما هناك اجنبيين لم يشاركا مع الفريق حتى الآن ومجلس إدارة للتسريبات طالما أن إجتماعات وقرارات مجلس الإدارة تصل قروبات الواتس والفيس بوك قبل أن يجف المداد الذي دون به محضر الاجتماع وممكن نقول عليه مجلس إدارة الفيس بوك باعتباره اول مجلس إدارة في العالم يعتمد ويبتدع الفيس بوك ناطقا رسميا باسمه مع احترامنا للزميل هيثم كابو (المستقيل وغير المستقيل مافي زول عارف حاجة ) وممكن نقول عليه إنه أول مجلس إدارة يتعاقد مع أجنبي لادارة الفريق الأول وحتى الحظة مافي مريخابي عارف مهام النفطي شنو (للتنقيب ام للتطييب) وحاتم محمد أحمد شنو وبقية أعضاء فريق العمل في الدائرة الشيطانية شنو.

*ماكان العشم مجلس إدارة نادي المريخ الذي تمنيناه وتوسمنا فيه خيرا ودعمناه بقوة لأجل إحداث نقلة نوعية في النادي وعلى الأقل المحافظة على الوحدة والاستقرار في النادي فاذا بنا نصطدم بالتشاكس والتخبط والعشوائية بكل معانيها سيدة للموقف والخلافات التي عكرت صفو القلعة الحمراء على قفا من يشيل والضرب تحت الحزام علنا بعد أن ثبت لنا بما لايدع مجال للشك انه مجلس تفصيل قبول الإستقالات وفق مواقع فيس بوك وتقنية فار وقروبات واتساب وتيليجرام (وإتفرج ياسلام) واللهم أرحم طحة الشفيع رحمة واسعة .
*لافرق بين المجلس السابق والإدارة الحالية زمان كنا ماشين بالنفرات وهسه بنفرات القروبات برضو وزمان كان جمال الوالي يتكفل بتجديد عقود اللاعبين وهسه برضو ظهرت نفس النغمة وبنفس الملامح والشبه وكلما إدلهمت الأمور وإكفهرت الوجوه وجاطت الحكاية طوالي جماهير المريخ تستنجد مرة بالتازي ومرة بالوالي ويبدو أن الأخير لسه عايش الدور ومنصب نفسه (رئيس طوالي) حسب هتافات جماهير المريخ في عهده الزاهي وجميل.
*غايتو لو المجلس الحالي قبل تكفل الوالي أو التازي أو مزمل أو أي شخصية من خارج المجلس بالتجديد مع عمار طيفور يكون مجلس إدارة (لاحازم ولا حاسم ولا جاكومي ولا كابيلا وبل مجلس إدارة مرتديلا ) أما إذا انتقل طيفور لابوالهل (أوووووك) بتكون (قيامة وقامت) ونار محمد الحسن قيقم كان ولعت مين البطفيها فالمعادلة صعبة وحساباتها معقدة جدا وغايتو (ياعمار أشعلت النار) مع الفارق في الهتاف والمغزى منه بالنسبة لعمار خالد اشعل النار لأنه سجل 3 اهداف في شباك الزبون والمدعوم الصفري المحلي الدائم وبالنسبة لطيفور لأنه وضع الإدارة الحالية في المحك وبالعامية كدة في (خانة اليك ) بل (دخلهم مدرسة عديل كدة) كما يردد حرفاء وظرفاء ومجانين الكتشينة والدومنا والشيش بيش.
*ياربي المدرب غازي الغرايري دة جاب النفطي بعد ماشاف الحفريات في الإستاد يكون فاكر الجماعة بنقبوا في النفط او البترول الزول دة كلموه ودة تصليح للإستاد مش تنقيب بترول أو ذهب.
*هو نحن لو عندنا النفط ساهل كدة كان (غنينا ) نحن حالنا كدة وإنتو حالكم كيف.
*نحن لسه في صف الغاز والرغيف والكهرباء عدم في عز الهجير والصيف.
*صيف مولع نار درجته أعلى وأكبر من أصفار الوصيف.
*وبعد دة كلو في الغناء متفائلين ونقول الخضرة في الضفة والقيف بعاين القيف.
*وبرضو مشكلتنا في الخريف دايرين مطر عشان نأكل كسرة ورغيف بس ماعندنا تصريف.
*مشكلة السودان في الخريف زي مشكلة الإدارة الحالية مع ملف عمار الحريف.
*وبرضو ياعمار أشعلت النار بس المرة دي بالمقلوب.
*أخشى أن يهتف أنصار (الأصفار) ياعمار أشعلت النار.
*ديل عادي يصدقوا انفسهم ويقنعوك هم من إبتدعوا هذا الهتاف.
*وكان جاء عمار خالد من توتي أو من لندن مابصدقوه.
*بس دحدودح وقلة وزيكو وابراهومة المسعودية وبريش العيلفون والديسكو وحمد الجريف كيف.
*وايداهور والضرب بالدور .
*والعجب وطمبل وكلتشي ورمضان وياسماني عليك الله قوم وأرقص تاني .
*خلونا نعيش على الذكريات الجميلة شوية.
*بصراحة كانت لنا أيام سعيدة ربي مناي تعيدا…
*لكن للشايفو دة صعب صعب يابريمة ..
*مازالت الفرصة مواتية للمجلس الحالي لإحراز كأس الذهب وإعادة الامور الى نصابها الصحيح.
*وساعتها سنهتف للحازم والحاسم والجاكومي وكابيلا.
*نحن مريخاب خلف كل عمل جميل ومميز.
*حتى اللحظة الجاكومي منفرد بالمرمى وهم جاريين وراهو …
*بس عيسى صباح الخير سجل زمان والجاكومي مر من الأول وفات من التاني والباقي قدامو مدافعين وحارس مرمى.
*فهل يفعلها ويسجل الهدف بإعادة استاد نادي المريخ كمان كان.
*لو وشوش صوت الريح فى (الرد كاسيل )
يسبقنا الشوق قبل العينين نحن وحياتك منتظرين يدفرنا الشوق قبل العينين .


Leave A Reply

Your email address will not be published.