عبدالعزيز المازري يكتب: شالو الكلام زادوه حبه جابوه ليك!!

*في العصر (امبارح) اقصد وقت العصُر وليس (العصِر) الحاصل علينا، المهم كنت قاعد (جمبي) جبنة الطين وشوية (فول مدمس) ارتشف القهوة قبل كتابتي للعمود كعادتي!
*وفاتح نفسي للآخر اتصفح في مجموعة من مجموعات التواصل تخيلوا اسم المجموعة شنو يا جماعة (القوالة)!
*اظن الواحد طعن في السن وما جايب خبر حيث قادتني (الاغلاط والجلطات) لهذه المجموعة حيث كنت ابحث عن كلمة (القوامة) !بس بدون مقدمات اظن كبست زر اللام بدل الميم وحصل الحصل
*غلطة عادية لكن (الشمشرة ) والشمار هو ماقادني لفتح المجموعة ..يظهر موضوع (القوالات) دي ما جينات سودانية بس ..المجموعة عراقية صرفة ولا علاقة لها (بالقوالة) حقت ناس ام الحسن والحسين وحنان جوطه ودي (شالت ) ودي ختت زي غنوة المرحوم حمد الريح التي تقول(شالو الكلام زادوه حبه جابوه ليك…ظاهر عليك صدقتهم ما الجوه قلبك في عينيك)
*المهم وانا داخل اشوف الحاصل اتضح ان المجموعة تتحدث عن النساء ((القوّالات) هكذا بالتشكيل ولا علاقة لها بما ذهبت اليه بدارجيتنا السودانية
* “قوّالة”. والقوّالة كلمة مستخدمة حتى اليوم في العامية العراقية للمرأة، فلا يقال للرجل قوّال. وربما قيلت المفردة قَوَّالٌ للزجّال في بلاد الشام أو مصر، أي الذي يكتب الأزجال
*ماعارف دار في ذهني وانا اتصفح بعض الكتابات من هنا وهنالك فوجدت من الكتابات ما ينطبق علي الرجل عندنا في السودان أيضا (قوال) فيكتب فلان قال لي وسمعت من فلان وفي مواقع التواصل قال لي فلان وطبعا لاتنسوا ان نقل الكلام ليس بحذافيره بل بزيادة (توم وشوية شمار) علي حسب المصلحة
*اغنية حمد الريح في مجتمعنا (بتاع ) الكورة دا ,,مفروض نتعامل بها ونكمل (جوك بالكلام صدقتهم سبت الضلوع اتنهدو
خليتنا في مره شقا ما تبقي الا علي العدو)
*خلينا في كورتنا أحسن انا برضو لو سألتني مناسبة المقدمة شنو! ارجع أقول (لو نحنا غاليين في عينيك ما تصدق الجابوه ليك )
*مجالس الأندية والاتحادات لو تعاملت بالشفافية بعيدا عن إفشاء الاسرار لبعض (الهتيفة) وأصحاب الحلاقيم العالية لما وصلنا لهذا التناحر والعدائيات في الرياضة التي تختلف عن السياسة تماما في التعامل وعلينا ان نتقبل مبدأ التنافس الحسن
*وخبر نحسبه من باب نقل الكلام انتشر بالأمس عن نية السوباط وشخصيات من مجلسه الترشح لقيادة الهلال..حتي هنا الخبر لا غبار عليه لكن في المرة الاولي التي طالعت الخبر كان بمعية السوباط الطاهر يونس ورامي كمال ونزار عوض وهداية الله والعليقي وفي المرة الثانية التي طالعت فيها الخبر في موقع اخر كان الفاضل التوم والخندقاوي وهداية الله والعليقي بجانب السوباط!
*لم اضني نفسي بالبحث عن الخبر عبر موقع الهلال او أي مصدر من المجلس نفسه لأن المرة القادمة في بحثي اعلم انني سأجد بمعية السوباط حميدتي !
*اها ظنكم لا يذهب بعيدا فحميدتي المقصود هو الباشمهندس نصرالدين حميدتي الذي يحمل عضوية الهلال وربما يكون أيضا من المرشحين القادمين في امبراطورية الهلال ..فالهلال وعاء للجميع …بما فيهم السلطان برقو شخصيا والذي ان ترشح سيقلب الموازين
*الاخبار التي تتري في الوسائط تحتاج لتنقيب وبحث وربما من صياغتها تحرك البعض للتقدم.
*ميزة الهلال واختلافه عن الوصيف وغيره من الأندية. عشاقه ومحبيه كثر فلا يقف علي رجل واحد كما يحدث في الند فمازالوا يتغنون بواليهم مدحا بعد ان عقرت حواء المريخ ليأتي علي سدة حكم المريخ بعد شاخور وغيره الجاكومي تصريحات والقنصل حازم
*كلمة حرة أخيرة…الهلال عالم جميل سادتي
كلمات حرة
*ينازل منتخبنا الوطني اليوم موريتانا في مباراة تعكس حقيقة الإعداد للصقور
*محسن وبرهان امام تحدي خاص فمن طلب مسؤولية تولي الاشراف علي المنتخب يجب عليه ان يكون قدر المهمة
*إنجازات الاتحاد السابق ومستر فلويد وود بخيت يجب ان تستمر رغم سوء الاختيار والامرخة.يظل المنتخب منتخب السودان
*إجازة النظام الأساسي في الهلال إنجاز مهما اجتهد دعاة المدينة الفاضلة في (التبخيس)لكننا مع احترام الآراء ويجب ان تسود في مجتمع ينشد الديمقراطية
*قلوبنا مع القنصل حازم تلقاها من مين ومين .. من سوداكال وكاس ولا من الجاكومي وطيفور!!
*ملعب المريخ الذي تقوم بترميمه شركات الدعم السريع بقيادة الجاكومي شخصيا سيدخل الخدمة بعد 60 يوم كما جاء في الاخبار..خير وبركه الهلالاب قلبهم ابيض زي فانيلة الفريق
*بعد إعلان المسابقات اعتماد ملعب الهلال الجوهرة الزرقاء التي تسر الناظرين ملعبا للهلال ولمواجهات فرق الدوري الممتاز من غير الوصيف ..اقدم الوصيف بواسطة نائب رئيس مجلس الموردة الجاكومي علي مخاطبة الاتحاد بتحديد ملعب الأبيض ملعبا للمريخ
*ماعلينا اذا كان ملعب الأبيض ملعبا للمريخ فما موقع هلال الأبيض يعني الملعب يكون ملعب الهلال والوصيف..برضو ماعلينا من يريد ان يحدد ملعب عليه ان يتحمل تبعات قراراه بتحمل نفقات الفرق واستضافتها فهل يقوي الجاكومي دعم علي ذلك
*في كل يوم يتضح لنا ان الجاكومي هو صدي الفعل وليس كما قال سابقا ان المريخ الفاعل فها هو يرد بصدي ما صدر عن الهلال من مطالبته باللعب في جوهرته
*كلمة حرة أخيرة..الامين العام للاتحاد لا يتعامل مع مجلس منتهي الصلاحية ..خطابك بلو واشرب مويتو
حكاية
الديقراطية ياهلالاب تعني احترام الرأي الرأي الاخر..العاجبو النظام مرحبا والماعاجبو تمت الإجازة


Leave A Reply

Your email address will not be published.